قانلی شراب

من عشق طریقینده شتاب ایلدیم اولدی

غم قلعه سین آماج شهاب ایلدیم اولدی

من چوخ تلسیردیم کی بو هجران باشا چاتسین

هجران اودینا قلبی کباب ایلدیم اولدی

غم دریاسینا آتدی منی گردش دوران

من صبریله دریانی حباب ایلدیم اولدی

آیدین گونومی چولقادی بیر پارچا قارایه

مین ظلمتیلن رفع حجاب ایلدیم اولدی

سللر داشیب آشدی درلردن تپه لردن

گوزیاشیمی مین چشمییه آب ایلدیم اولدی 

بیر قطره من ایشدیم می ناب ازلی دن

عاقللری دیوانه حساب ایلدیم اولدی

ای مدعی گت بیر بیله سن چخما اوزوندن

غم سرکه سینی قانلی شراب ایلدیم اولدی